Rarezas no esteiro do Anllóns

Rarezas que acudiron algunha vez ó esteiro do Anllóns

No mundo das aves coñécense como«rarezas» a aqueles exemplares dunha especie que visitan unha ou poucas ocasións un lugar. O ornitólogo José Luís Rabuñal Patiño, que leva 30 anos observando aves na Insua, é un excelente coñecedor destas rarezas. Ten catalogado exemplares que se achegan ata aquí desde o continente americano, euroasiático ou africano.

Os observadores de aves, cando localizan unha rareza, indícanlle a súa presenza a unha sociedade ornitolóxica quen, pasado un tempo, homologa esa aparición.

Ata o ano 2005, José Luís Rabuñal Patiño ten catalogado unha importante variedade de rarezas procedentes do continente americano. Así, apareceu só unha vez e nunca noutro punto da península Ibérica o mergullón cincento americano (Podiceps grisegena bolboellii). Homologouse a aparición por primeira vez aquí para a península Ibérica da cerceta de Carolina (Anas carolinensis), o parrulo bóla (Aythya affinis), o pirliño de Maur (Calidris mauri), o pirliño miúdo (Calidris minutilla), o pirliño de Baird (Calidris bairdii), o bilurico patiamarelo grande (Tringa melanoleuca), gaivota de Bonaparte (Larus philadelphia).

Homologouse a terceira cita para a Península do abetouro americano (Botaurus lentiginosus). As dúas únicas citas homologadas para a Península do éider real silvestre (Somateria spectabilis) foron aquí no esteiro. As tres primeiras citas homologadas de parrulo pentumeiro americano (Melanitta perspicillata). A píllara semipalmada (Charadrius semipalmatus) ten aquí dúas citas homologadas e está pendente unha terceira do mes de outubro de 2004, que xunto con outra da lagoa de Traba (Laxe), son as únicas citas para a Península.

Moito menos frecuentes son as rarezas de orixe euroasiática ou sahariana. De todos modos, cabe destacar as dúas únicas citas saharianas para Galicia do corredor sahariano (Cursorius cursor) e do pedreiro do deserto (Oenahthe deserti).