O Museo do Dolmen de Dombate acollerá as aulas científicas da Deputación da Coruña

Sen definir

A ciencia será a protagonista do programa que a Deputación da Coruña, en colaboración co Concello de Cabana, bota a andar o vindeiro venres día 26 de marzo coa primeira xornada no Museo do Dolmen de Dombate e disponíbeis na rede desde o día 31.

A astronomía é o centro do primeiro dos encontros científicos que se producen, como destacou o físico e coordinador Jorge Mira, no territorio en que se produce o último sol de Europa, cun grande potencial para o turismo astronómico. Na presentación participaron tamén o deputado de Patrimonio, Xosé Luís Penas e o alcalde de Cabana de Bergantiños, José Muíño.

A Aula de Estudos Científicos da USC acolleu hoxe, martes 23 de marzo, a presentación do programa ‘A luz da ciencia desde o Dolmen de Dombate’, unhas aulas científicas organizadas pola Deputación da Coruña coa colaboración do Concello de Cabana de Bergantiños. Esta iniciativa de divulgación científica estrutúrase en xornadas de periodicidade trimestral.

No acto de presentación participaron o alcalde, José Muíño, o deputado de Contratación e Patrimonio, Xosé Luís Penas e o físico Jorge Mira. Todos os ponentes explicaron as accións e contidos que se desenvolverán na primeira das xornadas, dedicada á astronomía, e que contará cunha serie de investigadores e especialistas e unha mesa redonda.

Neste sentido, o alcalde de Cabana, José Muíño, O alcalde de Cabana, José Muíño, quixo “dar as grazas a todos os presentes. Hai unha estreita colaboración coa Deputación, e con Xosé Penas. Sen eles sería imposible organizar estas xornadas.”

O rexedor quixo tamén “darlle as grazas a Jorge. Comezamos unha andaina no 2003 coa ‘Noite das Estrelas’, e desde aquel momento nos explica o que é noso ceo. Daquela primeira semente acabaron nacendo estas Xornadas.”, e enfatizou que “sin Jorge sería imposible, polos seus coñecementos, poder falar de astronomía, e estas aulas axudarannos a poñer en valor os nosos monumentos e a súa relación coa astronomía.”

Muíño quixo sinalar “en nome do Concello de Cabana” estamos “moi contentos coa organización destas xornadas no que nós chamamos ‘A catedral do megalitismo’.

O deputado de Patrimonio, Xosé Luís Penas, agradeceu a colaboración do Concello de Cabana, e sinalou que estas xornadas "veñen para quedarse cun programa específico que vai tocar moitos temas, desde a astronomía ás vacinas ou outros aspectos da pandemia e tamén de patrimonio". Anunciou que serán cinco as xornadas, coordinadas polo científico Jorge Mira, co obxectivo de "facilitar o acceso de información científica a toda a sociedade".

Pola súa parte, Jorge Mira, definiu as xornadas como "unha acción maior de goberno da Deputación da Coruña" que, precisamente pola pandemia, vai ser difundida por medios dixitais e poderá chegar a unha poboación máis ampla. "Este acto está xa deseñado de partida para estar disponible en rede e vai ser dirixido á comunidade virtual, algo moi importante que poucas institucións están facendo co cal a chegada vai ser moito máis intensa", explicou Jorga Mira na súa intervención en que definiu o programa como "unha aposta do máximo nivel comezando pola astronomía que está enraizado na maxia da provincia da Coruña e no dolmen de Dombate".

Destacou tamén que neste territorio se produce "o último solpor de Europa" e permite unha estratexia que é a maxia da Costa da Morte para a explotación do turismo astronómico o que pon de relevo tamén "o tesouro que temos"

Esta primeira aula poderase seguir a través de Internet a partir do sábado 27 de marzo, sendo o primeiro dos capítulos que farán parte dun espazo formativo que estará dispoñible tanto nas webs da Deputación da Coruña (www.dacoruna.gal) como do Concello (http://www.concello-cabana.es/astronomiadombate). A gravación deste primeira aula terá lugar os días 26 e 27 de marzo, e poderá ser seguida de xeito presencial por un número de asistentes pequeno por mor das restricións sanitarias.

Os temas desta primeira entrega serán: ‘Cousas e movemento do ceo’, a cargo do astrónomo Borja Tosar; ‘Como definiu a astronomía a orientación dos monumentos antigos? Estudo arqueoastronómico do Dolmen de Dombate’, a cargo de A. César González García, Presidente da Sociedade Europea para a Astronomía na Cultura; ‘Busca dos puntos de último solpor da Europa Continental’, a cargo de Jorge Mira; ‘O Camiño do Sol a través da paisaxe’, a cargo de Fernando Rey Daluz, experto en fotografía astronómica; e a mesa redonda ‘Posibilidades de desenvolvemento vinculadas á observación astronómica na Costa da Morte’, coa participación do alcalde, José Muíño, Jorge Mira, Fernando Rey e Xosé Luís Penas, moderados por Santiago Garrido Rial.