Guía de itinerarios de turismo ecolóxico

Yolanda Díaz Romero
Concello de Cabana de Bergantiños / Consellería de Medio Ambiente, 2001

O corpo deste libro ofrece cinco itinerarios de turismo ecolóxico polo territorio de Cabana de Bergantiños. A autora, como froito do seu contacto con centos de turistas que visitaron as terras cabanesas, viu a necesidade de amosar o seu eido natal cunha ollada distinta ó doutros libros editados polo Concello. Carballeiras como as do Briño ou as de Santa Mariña do Remuíño, bosques de ribeira dos múltiples regatos que verten no río Anllóns, as costas rochosas bañadas por augas do Atlántico ou a diversidade botánica da enseada da Insua convidan ós lectores a unha viaxe pola flora autóctona de Cabana de Bergantiños. O volume complétase con mapas de situación, de rutas, consellos prácticos para a conservación da flora, glosario e bibliografía. As fotografías a cor son de Xurxo Sánchez.