O percorrido realizado estendeuse ata os 15 quilómetros que se andaron en 5 horas, cun descanso de 30 minutos para comer. Entre os participantes da excursión fluvial encontrábase o concelleiro de Turismo de Cabana de Bergantiños José María Rama Nantón, o técnico de cultura cabanés Martín Martínez Riobó, os técnicos de turismo Ángel Eiroa (Cabana), Javier Couto Castro (Ponteceso) e o escritor de Seavia, José Antonio Andrade Figueiras. O elenco completouse con veciños de Ponteceso, Corme, As Revoltas, Canduas, Santiago e Madrid. Estes últimos eran turistas hospedados en establecementos hostaleiros das entidades organizadoras.
A climatoloxía foi a ideal para realizar un percorrido de sendeirismo pola beira do río. Ó longo do mesmo, puidéronse ver moitos elementos de interese. Nos arredores da área fluvial da Garga, descubriron a antiga taberna, a imaxe da Virxe das Angustias na que paran a rezar os viandantes e o medidor para controlar as inundacións. Augas arriba, aparecían os muíños da Saímia, a central hidroeléctrica da ponte de Caldas, as pontes de Cardezo e Xabarido, a minicentral e a carballeira de Santa Mariña do Remuíño ata chegar á vella Pontedona, xa no concello de Coristanco. Os camiñantes, contemplaron esta vella ponte no seu estado ruinoso e puideron coñecer a historia acaecida a un avión inglés que nos últimos anos da Segunda Guerra Mundial caeu cerca de alí. A continuación, proseguiron subindo río arriba e xa comezaron a ver os primeiros muíños que lless anticipaban a chegada á área recreativa de Verdes.
A paisaxe descuberta ó longo do día foi ricaz e variado. Así, conxugouse todo un elenco de zonas de monte, xuncais, canaveiras, metros e metros de milleiras, prados, terrapléns... Nos treitos máis agrestes e costentos, axudaron moito para o tránsito unhas cordas colocadas por Javier Couto, así como a limpeza previa dalgunhas beiras que é preciso realizar todos os anos para que non se volvan a cubrir de maleza.
Ás oito da tarde, con puntualidade case que espartana, o guía, Ángel Eiroa puxo ó corrente dos distintos pormenores a desenvolver ó longo da camiñada a un colectivo asistente, que estaba conformado por nenos, adultos e maiores ataviados con roupas e calzado que lles permitiu transitar as ribeiras do Roncaduiro coa maior comodidade.
A sorpresa da tarde para todos foi a de poder contemplar o funcionamento do muíño do Ferreiro case ó inicio do paseo. Alí, agardaban os seus propietarios, Matilde Vilariño Pose e Antonio Mato Montáns, quen encheron a moega de millo branco que se foi convertendo pouco a pouco en fariña. Para algúns, que repetían ruta, non era novidade; non obstante, para outros, sobre todo turistas que se anotaron á camiñada, supuxo un auténtico descubrimento. Expresaron que sempre lles falaran dos muíños de auga galegos, pero que nunca viran ningún en funcionamento.
Tras o muíño do Ferreiro, a camiñada ascendeu, todo pola beira do regato, ata a ponte da área recreativa da Cidá para despois baixar polo lugar de Ures ata o campo da festa de novo.
Ás 10 da noite gran parte dos camiñantes e outra moita xente puideron degustar unha mexillonada organizada pola comisión de festas de Canduas mentres asistía ó concerto de The Turre’s Band.
O punto de partida será o campo da festa de Canduas e a hora as 8 da tarde. Desde alí, subirase ó longo das beiras deste regato, nas que o Concello habilitou unha das tres rutas de sendeirismo que hai sinalizadas no seu territorio. A infraestrutura deste percorrido confórmase de paneis interpretativos, sendeiros habilitados e pasarelas de madeira nalgunhas zonas para permitir o tránsito de persoas. O percorrido é de 3 km de lonxitude e nel aínda se pode observar un singular conxunto etnográfico de 24 muíños de auga colocados de modo escalonado desde as ladeiras do castro A Cidá de Borneiro ata as beiras da enseada da Insua. Nalgúns deles, encontranse esculpidas cruces nos marcos de pedra das portas. Segundo a tradición local, a súa función era impedir a entrada do demo ó muíño e ademais protexelo de todo mal. Constitúen, polo tanto, símbolos que cristianizaban e protexían o muíño e o muiñeiro.
Todo o regato tamén está rodeado de bosque fluvial no que, sobre todo, destaca un arbusto chamado ‘torvisco’ coñecido por posuír froitos de cor vermella e follas e corteza de efecto purgante e tóxico. No pasado, este efecto medicinal foi empregado polos veciños de Borneiro para erradicar os piollos das vacas. A tradición oral tamén di que se utilizaba en rituais para sacar ‘o mal do aire’.
O percorrido estará guiado por Ángel Eiroa, técnico de turismo do Concello de Cabana e, ademais, compoñentes da Coral de Canduas interpretarán cantigas populares con temática de muíños. Catro delas foron recollidas nos anos 30 do século pasado polo etnógrafo ourensán Xaquín Lorenzo Fernández, Xocas, durante a súa participación nas campañas de escavación do castro A Cidá de Borneiro.
Despois da camiñada, ás 10 da noite, no campo da festa agarda unha mexillonada organizada pola comisión de festas de Canduas e a música de The Turre's Band.
O programa do día é o seguinte. A partir das nove da mañá sáese, en distintas paradas, desde Corme, Ponteceso e Cabana, para chegar ás 10 a Anllóns. Nesta parroquia, visitarase a ponte da Garga, o conxunto de muíños da Saímia e a ponte de Caldas. Despois, en Corcoesto andarase pola ponte de Cardezo e por Santa Mariña do Remuíño. En Langueirón, coñecerase a ponte de Xabarido e en Xornes a de Pontedona. Por último, xa na parroquia coristanquesa de Verdes poderanse observar as pequenas fervenzas que forma o río Anllóns así como o interesente o conxunto etnográfico conformado por un amplo número de muíños. A volta está prevista entre as 5 e 6 da tarde.
Esta ruta de sendeirismo está organizada polas áreas de turismo e xuventude dos concellos de Cabana de Bergantiños e Ponteceso.
O momento de maior número de espectadores coincidiu coa prevoda medieval, que neste ano tivo como protagonistas a parella formada por Carmen María Andrade González, veciña de Corcoesto, e a Eric Goulet, veciño da localidade francesa de Le Guyonniere. A gran novidade desta prevoda foi a súa apertura mediante unha zancuda, o acompañamento co grupo de gaitas Lume na Cachela e o seu transporte a cabalo. Ademais, os prometidos estiveron acompañandos por dúas nenas de arras: Andrea e Antía Suárez Souto. Coma o ano pasado, oficiou a cerimonia Tamara Lema Rodríguez. E todo o acto estivo coordinado pola profesora de teatro Silvia Losada Crende.
Ó longo de toda a xornada o público puido rir a esgalla coas malaventuras do Lazariño que representou Caramuxo Teatro, cos paseos a cabalo, co inchable O Castelo Encantado, coa gastronomía local (este ano acabouse o churrasco), coa artesanía e coas intervencións musicais de Lume na Cachela e Os Panchos de Jolfendro. A última actuación, cun espectáculo de lume, correu a cargo do malabarista Fredi Muíño.
A cita foi o pasado domingo. O grupo partiu do lugar de Fornelos ás 10 da mañá, pasaron por vellos camiños das aldeas cabanesas de Dombate e Fontefría. Ás 14 h, o técnico de turismo do concello de Cabana, Ángel Eiroa, ofreceulles unha visita guiada do castro A Cidá de Borneiro. Tras esta visita xantaron na área recreativa do castro. Despois de tomaren a sobremesa baixaron ata Canduas e subiron pola ruta do Rego dos Muíños co cal puideron contemplar un dos máis interesentes conxuntos etnográficos de muíños da Costa da Morte. Finalmente, co cansazo no corpo, regresaron á aldea de orixe na caída da tarde.
Aquelas persoas que queiran inscribirse deben efectuar a súa inscrición na oficina de información turística, sita tamén na Casa da Cultura ou no teléfono 981 754 020.
A exposición de Jaime Gagino amosa as distintas técnicas de traballo no mundo da cestería como a confección de cestos con vimbio, médula, palla, silva, lamias de carballo e mesmo cestería de reciclaxe con follas de periódico. En canto ós produtos resultantes pódense observar todo tipo de cestos, cestas, paxes así como sellas, botellas vestidas ou un cabaceiro elaborado con vimbio e palla. A peza máis espectacular é o paxe do carbón, que amosa unha boca de máis de un metro de diámetro e está elaborado con vimbio groso.
Ademais, na aula de proxeccións amósase un audiovisual permanente sobre o cesteiro de colmo de Cerqueda José Otero Álvarez na que se amosa todo o percorrido da elaboración deste tipo de cestería.
O proxecto «Dunas do Anllóns» ten como obxectivos, entre outros, recuperar a navegación polo río, dar a coñecer o pasado da carpintería de ribeira nesta zona, promocionar a enseada da Insua como Lugar de Importancia Comunintaria, crear unha nova ruta de interese turístico na Costa da Morte, potenciar unha navegación limpa e sen contaminación ou abrir unha aula ambiental e de estudos científicos.
Para todo isto, os promotores do proxecto baseáronse na histórica vinculación que a desembocadura do Anllóns tivo co mar. Desde sempre, este foi un espazo destinado á extracción marisqueira e á pesca, a area transformouse en fonte de recursos para a agricultura e máis tardiamente para a construción e, o máis importante, existiu un enorme auxe da construción naval en madeira que se amosaba en magníficos barcos de pesca, buques de cabotaxe, embarcacións areeiras, botes ou chalanas.
O resultado final é a nova construción dun barco areeiro que será bautizado co nome de «Dunas do Anllóns». Esta embarcación presenta as seguintes características: 10,5 m de eslora, 3,20 de manga, 0,50 de calado, casco de madeira laminada, armazón de madeira de Iroko. Non obstante, a súa característica máis importante é a propulsión mediante enerxías renovables. Para iso, conta cun teito de placas solares que serán a súa principal fonte de enerxía, aínda que se completará con tomas de corrente eléctrica cando sexa necesario e se encontre atracada a porto.
Os usos de «Dunas do Anllóns» serán múltiples. Atenderase á poboación escolar pero tamén á turística. A súa botadura e posta en funcionamento prevese realizala na primavera de 2011 na propia enseada da Insua.
O día 27 de xullo clausuroúse a SEMANA CABANA DEPORTE, donde vinte rapaces disfrutaron durante sete días de diferentes actividades, xogos na praia, piscina, saídas ou actividade deportiva, clausurou o acto o ALCALDE
O día 22 de xullo, trinta e catro nenos de Cabana Deporte foron montar a cabalo ó centro ecuestre O LAUREL en Carballo
O día 21 de xullo un grupo de rapaces de Cabana, xunto co resto de concellos que forman COSTA BERGANTIÑÁ, desprazaronse ata o parque natural de Marcelle (Lugo), alí estiveron durante todo o día vendo os animais e en diversos talleres da natureza.
Para o vindeiro mes de agosto, dentro da programación cultural do Concello de Cabana, celebrarase a terceira edición da actividade Unha noite no medievo que tanto éxito acadou nas dúas pasadas edicións.
O presente ano volverán a ter moito peso as recreacións históricas. Por iso, se volverá a convocar a todas as parellas de novios que queiran participar nunha “prevoda medieval” se poñan en contacto co departamento de Cultura.
Aqueles que queiran formar parte desta voda medieval, que non terá efecto oficial, senón oficios, pódense inscribir no departamento de Cultura do Concello de Cabana ou ben chamando ó teléfono 981 754 020.
As parellas participantes serán vestidas cun traxe de labregos medievais e engalanaranse con coroas e ramos de flores silvestres.
Na pasada edición, acudiron tres parellas de noivos (solteiros): Purificación Sueiro Rodríguez e Juan José Villar García de Canduas, Carlos Manuel Sande Martínez e Zulaika María Grille Cancel de Riobó e Silvia Baña Rodríguez e Marcos Baña López de Camelle
O programa Meniñeiro, que organiza de modo gratuído o departamento de Servizos Sociais do Concello de Cabana de Bergantiños, vén de clausuar as actividades do primeiro grupo.
Os destinatarios do Programa Meniñeiro son nenos e nenas de 5 a 8 anos radicados en Cabana de Bergantiños. O número de prazas dispoñibles para cada grupo é de 15. As actividades desenvólvense por grupos do 5 ó 16 de xullo de luns a venres en horario de 10.00 a 14.00 h.
O principal obxectivo deste programa é que o alumnado goce do tempo de lecer con actividades lúdicas cun alto nivel de contido educativo. Para iso, desenvólvense actividades como o debuxo con lapis, carbonciño, xiz, café e collage-mural, elabóranse botes decorativos de area de cores e cunchas, modélanse retratos en barro e figuras humanas en plastilina, fabrícanse xoguetes, cósense estoxos e bolsos, elabóranse xarróns con material de reciclaxe e diferentes frores de papel, visiónanse vídeos de animación sobre o medio ambiente, créanse bonecos alados con medias e practíanse xogos tradicionais, deportivos, baile, xincanas, etc.
O programa meniñeiro é totalmente gratuíto e está subvencionado pola Deputación Provincial da Coruña.
No Centro Social de Neaño, clausurouse un novo obradoiro de memoria para maiores
O venres día 2 de xullo iniciouse o curso AFD no Concello de Cabana de Bergantiños, con unha duración de 325 horas en horario de 9:00 a 14:00 h de luns a venres na Casa da Cultura. Está dirixido prioritariamente a desempregados inscritos na correspondente Oficina de Emprego con un total de 15 prazas. Para a impartición dos módulos do curso están contratados unha enfermeira e unha psicóloga. Ademáis recibirán como módulos transversais “Formación para a igualdade” e “ Inserción laboral: técnicas de busca de emprego.
A Casa da Cultura abrirase durante os meses de xullo e agosto para impartir aulas e ofrecer información turística. A formación será nos eidos da informática e en obradoiros de escrita en lingua galega. A información turística contará cunha exposición multimedia titulada Cabana en imaxes.
No apartado Noite e día Cabana é unha romaría destacan as propostas musicais coas que o Concello colabora para dinamizar a súas romarías. En Santa Mariña do Remuíño (Corcoesto) actuará a charanga O Rumbo de Fisterra. No Carme do Briño, a banda de música de Negreira. No San Fins do Castro, Festa de Interese Turístico, a banda de música Eduardo Pondal, os gaiteiros de Anos, a charanga O Rumbo de Fisterra, O Tren da Unha e Lume na Cachela.
O ciclo Verán de teatro ten como obxectivo a formación e a divulgación teatral ó longo das parroquias. No aspecto formativo, polas mañás desenvolverase a Aula de Verán de Teatro no Auditorio Municipal nas modalidades infantil, primaria e adultos. No plano divilgativo, o alumnado da Escola Municipal de Teatro manterá unha xira coa obra Restaurante Farruco polas parroquias da Silvarredonda, Nantón, Corcoesto, Cundíns e o lugar de Neaño.
No apartado Noites de Cabana ofértanse distintas propostas para os venres e sábados, fundamentlmente. O venres 9 de xullo, na praza de Neaño, proxectarase a película “Viaje al centro de la tierra”. O sábado, 17, no campo do Briño celebrarase unha regueifa con Antonio e Suso de Xornes e todos aqueles que queiran participar. O venres 23, na Casa Cultural de Canduas, celebrarase un guateque a cargo do grupo Abbey Road, encargados de lembrar dunha maneira nova e fresca a música dos Beatles. A última proposta do mes de xullo será o sábado 24, a partir das 5 da tarde, co Castro Animado con stands de artesanía, animacións teatrais e históricas, xogos tradicionais, degustacións gastronómicas de porco celta e a música tradicional de Birimbao.
Para o mes de agosto resérvanse tres datas. O mércores 11, Jorge Mira guiará o percorrido das estrelas desde Anos ata a pena da Eirita. Na tarde-noite do sábado 14, terá lugar a IIIª Noite no Medievo no lugar de Riobó con paseos a cabalo, animacións teatrais, artesanía, prevoda medieval e música a cargo dos Panchos de Jolfendro e Lume na Cachela. A última cita do verán será o sábado 21 cunha camiñada polo regos dos Muíños, en Canduas. Poderase degustar unha mexillonada e asistir ó concerto da Magnífique Band dos Homes sen Medo.
O Departamento de Servizos Sociais do Concello de Cabana de Bergantiños, en colaboración coa Cruz Vermella de Carballo, organizou unha ESCOLA DE AVÓS/AS EDUCADORES/AS coa fin de informar e formar a persoas maiores á hora de desempeñar o labor de educadores/as.
Durante 12 sesións, os monitores/as da Cruz Vermella ofreceron o seu apoio a a avós e avoas na súa función educativa e coidadora reforzando as habilidades e estratexias necesarias para desenvolver de forma cotiá esas funcións.
Hoxe venres, 2 de xullo celebraron a clausura con actividades interxeneracionais e de cohesión familiar con merenda incluída.
Os proxectos deberán presentarse no GDR ?Asociación de Desenvolvemento da Comarca de Bergantiños? con sede en Buño, Concello de Malpica.
INFORMACIÓN: